عربية فول

بجد كل ما أشوف عربية فول ببقى خلاص قلبى بيتقطع ... أصلا ً أنا واحد أكيل و ممكن أكل أى وقت أى حاجة بحبها أى كمية , وبموت فى حاجة اسمها فول و بادوب فى الفلافل , بحكم التواجد فى الشوارع لأى سبب ( أحيانا ً كتير من غير سبب ) الواحد أكل من محلات كتير حاجات مختلفة: أكلنا فول و فلافل و كبده مالهاش علاقة بالكبده ( سلام يا فهمى ) و سجق تقريبا ً ريسيكليد و فراخ بانيه عمرها ماكاكت و كشرى بلاستيك ... الحاجة اللى لسه الواحد معملهاش هيى عربية الفول ... كفاية احساس الأوبين بوفيه اللى مليان بصل و بدنجان و مخلل و الطبق الألومنيا الصغير اللى مابيخلص , الواحد حاول يرضى غروره فى محمد أحمد بس للأسف برضه البنى أدم باطنه فاضية و لازم أكل من العربية فى يوم إن شاء الله و ربنا يستر.

سبيل

أخيرا ً سبيل ... أحمدك يا رب , "لا تنسوا الحاجة فاطمة فى الدعاء" طيب يا سيدى من عينينا ... تمد إيديك و تفتح الحنفية بس ما فيش ميه , طبعا ً حضرتك متنرفز و تعض تلعن فى الحاجة فاطمة و هى أصلا ً مالهاش ذنب , إنما واحد ظريف زيك هوا اللى كاسر الكولدير و مبوظوا , تضطر إنك تشرب من أولة من اللى محطوطين جنب الكولدير مع إن العالم كلها حواليك عماله توعيك ماتشربش مكان حد و ماتكلش مكان حد و ما تمشيش جنب حد و ما تسلمش على حد من الأخر كده أعض فى بيتكو و ريحنا منك .
كل السبل برضوه قديمة يمكن عشان كلها قديمة و مافيش حد بقى بيعمل سبيل أصلا ً أو شوارعنا بتبهدل أى حاجة أو استخدامنا الغير واعى و جايز كل ده بس بيفضل السبيل ليه حلاوته فى بؤقك . شربت منه و أنت راجع من المدرسة ... و أنت رايح الدرس ... دست راس واحد صحبك و هو بيشرب لأنك أستاذ غلاسة فراح هوا رشك بتلات كوبيات ميه مش هموا الشتيمة و الضرب من الناس و أنت طلعت تجرى فى الخالعون .
ربنا يرحم الحاجة فاطمة و أمثالها

نصبة شاى

أى حتة فى مصر لازم يكون فيها نصبة شاى ... أى شركة أو مدرسة أو كلية أو على البحر أو حتى وزارة . النصبة ممكن تكون نضيفة و ممكن تكون ... يعنى مش قوى بس فى أى حالة الحاجة سواء كانت شاى , قهوة , ينسون , نسكافيه أو أى بطيخ بتبقى عسل و بتظبوط الدماغ . يمكن يكون الرغبة فى حاجة تفوق هى اللى بتفوق بس المهم أنك تفوق بدل ماتنام فى المحاضرة .
حاجة مهمة برضو أن اللى بيبقى ماسك النصبة بيبقى طيب و متواضع و محبوب من كل الناس مش عارف ليه و بتحس أنه بينقذك و إنه له مكان مهم فى حياتك . ده غير إن نفوذه بيبقى كبير و يعرف يوصل أكتر من الدكاتره كمان (فى الكلية) و يخلصلك أى حاجة ببساطة لأن كل الناس عارفاه و هو اللىى ظابطلها دماغها.
أنا رايح أضرب قهوة من أحمد ... أجبيلك معايا ؟؟